Ali Ahmeti takim me ambasadoren e Gjermanise

Kryetari i Bashkimit Demokratik për Integrim (BDI), Ali Ahmeti ka zhvilluar sot në Shkup një takim pune me Ambasadoren e Gjermanisë në Maqedoni, Kristinë Althauser. Kryetari Ahmeti dhe ambasadorja e Gjermanisë, thuhet në komunikatën drejtuar mediave, diskutuan për gjendjen në vend dhe prospektet e krijimit të qeverisë së re pas zgjedhjeve. “Kryetari Ahmeti vlerësoi që zgjedhjet e 11 dhjetorit ishin të besueshme, demokratike dhe rezultati u pranua nga të gjithë pjesëmarrësit si dhe komuniteti ndërkombëtar. Ahmeti vijoi për të shpjeguar opsionet mbi të cilat në BDI po zhvillohet debat i hapur dhe konstruktiv a ato përfshijnë koalicion me VMRO-në, me LSDM-në, koalicion të gjerë politik qeverisës, të mbeturit në opozitë si dhe përsëritja e zgjedhjeve. Kryetari Ahmeti foli edhe për bazën e gjerë të konsultimeve që po zhvillon, jo vetëm në parti, vend e rajon, por edhe në qendrat kryesore të vendosjes mbi situatën në të cilën gjendet vendi përballë nevojës për formim të qeverisë, por edhe përballë zhvillimeve gjeopolitike. Ahmeti theksoi nevojën e përkrahjes gjermane për integrim euroatlantik dhe për zhvillim të reformave në vend duke theksuar që gjuha shqipe, reformat sistemore dhe integrimi në NATO dhe BE mbeten prioritete absolute dhe të panegociueshme për BDI-në”, thuhet në komunikatën e partisë së Ahmetit.