Labinot Tahiri: Do t’i fitoj zgjedhjet në Ferizaj, do të jem kryetar (Video)

Pasi ka folur gjerë e gjatë për çështje të ndryshme të politikës sikurse demarkacioni me Malin e Zi, bisedimet mes Kosovës dhe Serbisë dhe liberalizimin e vizave bashkë me integrimet evropiane, këngëtari Labinot Tahiri ka shpallur zyrtarisht kandidaturën e tij për kryetar të Ferizajt.

Këngëtari, i cili vendosi të bëhej politikan pas një karriere të suksesshme si këngëtar i muzikës turbo-folk hyri në politikë pas një fushate të gjatë me veprimtari humanitare duke ndihmuar familjet e varfra.

Labinot Tahiri i njohur edhe si Labi me emrin skenik, tha në emisionin “Kontakt” në “Tribuna” se meqenëse është anëtarësuar në partinë Aleanca për Kosovën e Re të drejtuar nga Behgjet Pacolli, ka vendosur që zyrtarisht të kandidoj për kryetar të Ferizajt.

“Kam vendosur që të kandidoj si kryetar i Ferizajt me AKR-në dhe kam besim të plotë që do ta fitojë garën”, ka thënë Tahiri.

Sipas tij, është e rëndësishme që Ferizaj të ketë një kryetar që e meriton dhe që punon për njerëzit e qytetit, duke ua bërë atyre jetën më të mirë.

Tahiri njihet si kritikues i madh i qeverisjes lokale në Ferizaj e udhëhequr nga Partia Demokratike e Kosovës.

Ai tha se Administrata Tatimore e Kosovës i ka kërkuar, që të themelojë një fondacion në mbështetje të familjeve të varfra,  duke treguar edhe kohën se kur do ta themelojë.

Tahiri ka folur edhe procesin gjyqësor në Francë ndaj ish-kryeministrit, Ramush Haradinaj.

Ai beson se ashtu siç nuk u lejua të hyjë treni në Kosovë, njejtë do të ndodhë edhe me rrënimin e murit në veri.

Në këto rrethana, ai thotë se është momenti i fundit që të themelohet edhe ushtria e Kosovës.

Shpalljen e njëanshme të Asociacionit të Komunave Serbe, Tahiri thotë se nuk duhet ta lejojë Brukseli zyrtar, transmeton Gazeta Tribuna.

Ai beson se mund të përsëritet “eksodi” i qytetarëve të Kosovës, për shkak të stërzgjatje së procesit të liberalizimit të vizave.

Si kandidat i AKR për kryetar të Ferizaj ai thotë se do ta bëjë këtë komunë  bastion për punësimin e të rinjve.