Ndërkombëtarët po punojnë për mbetjen e BDI-së jashtë qeverisë, çelësi te Zijadin Sela

Edhe pas ngjarjeve të dhunshme të 27 prillit në Kuvend, BDI po vazhdon të luaj lojëra të fshehta me VMRO-DPMNE-në, njoftojnë burime partiake. Informatat për këto lojëra kanë arritur edhe te përfaqësuesit e bashkësisë ndërkombëtare, kurse si shembull konkret përmendet loja për emërimin e Prokurorit aktual Marko Zvrlevski në postin e përjetshëm të zv/prokurorit. Burime partiake thonë se BDI i ka borxh Zvrlevskit për rastin “Magjar Telekom”, të cilin refuzoi tia japë Prokurorisë Speciale, këtë rast ku përmenden “dy kokat” e BDI-së, Ali Ahmeti dhe Musa Xhaferi për ryshfet prej miliona eurove.

Mirëpo duke pasë parasysh se shumica e rasteve të dyshimta gjyqësore në Maqedoni gjatë pushtett VMRO-BDI mbjanë pikërisht “vulën” e Zvrlevskit, loja e BDI-së në favor të tij, ka irituar edhe ndërkombëtarët edhe LSDM-në e Zaevit, të cilët kanë filluar të punojnë në drejtim të përjashtimit të BDI-së nga shumica prej 67 deputetëve, shkruan Gazeta Lajm.

Në këtë mënyrë, qeveria pa BDI-në, që është vullnet i rreth 150 mijë votuesve shqiptarë i shprehur në zgjedhjet e 11 dhjetorit, mund të bëhet shumë lehtë realitet. Çelësi për realizimin e kësaj dëshire të shumicës bindëse të votuesve shqiptarë, gjendet në duart e liderit të Aleancës për Shqiptarët, Zijadin Sela, sepse Lëvizja Besa dhe PDSH në kontaktet me ndërkombëtarët, parimisht janë pajtuar që qeverie e re reformatore gjatë funksionimit të mos kushtëzohet nga mbeturina të pareformuara nga qeveritë e Gruevskit.

Nëse për një gjë të tillë pajtohet edhe Sela dhe Aleanca për Shqiptarët, atëherë shumica e re parlamentare mund të sigurohet edhe pa BDI-në, duke pasë parasysh se së shpejti VMRO-së mund t’i shkëputen 4 deputetë.

Ja matematika e ndërkombëtarëve për formimin e qeverisë pa VMRO-në dhe pa BDI-në:

LSDM 49 deputetë

Lëvizja Besa 5 deputetë

LR PDSH 3 deputetë

PDSH 2 deputetë

Deputetë që do shkëputen nga koalicioni i VMRO-së – 4 deputetë

Gjithsej 63 deputetë

Ky koalicion do të ketë shumicë edhe më stabile, pasi në rast se BDI nuk përfshihet në koalicionin qeveritar, asaj mund t’i shkëputen 2 ose 3 deputetë, me çka shumica do të shkonte deri në 66 deputetë. “Vetëm një koalicion i tillë do të mund të zbatonte reforma të vërteta, sepse me BDI-në brenda si partner lojal i VMRO-DPMNE-së, vështirë se Zaevi do të arrijë të realizojë reformat që i premtonte. Me BDI-në brenda në qeveri, Zaev do të përballet me rezistencë të fortë në realizimin e synimit të tij për arrestim të kriminelëve dhe për konfiskim të pasurive të tyre”, kanë thënë diplomatët perëndimorë të cilët fuqimisht po lobojnë për formimin e këtij koalicioni, shkruan Gazeta Lajm.

Sipas tyre, mbetja e VMRO-së dhe BDI-së bashkë në opozitë, do të ishte një mundësi e artë për këto dy parti të reformojnë radhët e veta.