Thaçi merr për Këshilltar ish-zyrtarin e AAK’së dikur Shef i UÇK’së

Presidenti Hashim Thaçi e ka emëruar për Këshilltar ish-Komandantin e Përgjithshëm të Ushtrisë Çlirimtare të Kosovës, Bislim Zyrapin. Për emërimin e tij, Presidenca nuk ka lëshuar asnjë njoftim. Zyrapi kishte humbur garën për Kryetar të Prizrenit kur kishte kandiduar në vitin 2009 me Partinë e Ramush Haradinajt.

Ish-Shefi i UÇK’së tash e një muaj është duke e këshilluar Presidentin e Republikës. Hashim Thaçi e ka emëruar për këshilltar Bislim Zyrapin dikur zyrtar i lartë i AAK’së dhe kandidat për Kryetar të Prizrenit.

Para shtatë vitesh, Zyrapi kishte lënë pozitën e Shefit të Departamentit për Emergjenca Civile në Ministrinë e Punëve të Brendshme për t’u bërë pjesë e AAK’së.

Zyrapi i ishte bashkuar UÇK-së në fillim të luftës në pranverë të vitit 1998, dhe ka qenë shef i Shtabit të Përgjithshëm deri me ardhjen e Agim Çekut, në pranverë të vitit 1999.

Këshilltari i Presidentit kishte qenë edhe dëshmitar në gjykimin e Fatmir Limajt për Rastin “Kleçka”, ku kishte konfirmuar se kishte dëgjuar për zonat e ndalimit dhe hetimit që UÇK kishte shfrytëzuar gjatë kohës së luftës, shkruan Gazeta Express.

“Kanë qenë dhoma të ndalimit dhe hetimit, për të cilat nuk kam pasur njohuri personalisht se sa kanë qenë, mirëpo kam dëgjuar që ka pasë”, kishte deklaruar Bislim Zyrapi. Ai kishte thënë se Fatmir Limaj kishte pasur pozitën e Drejtorit të Drejtorisë së Policisë Ushtarake në UÇK.

Bislim Zyrapi ka pasur edhe pozitën e togerit në ushtrinë jugosllave dhe kishte shërbyer në Bosnjë.

Në deklarimin e pasurisë që e ka bërë në Agjencinë Antikorrupsion, Zyrapi ka deklaruar se ka edhe një vend pune si ligjërues në një universitet privat krahas punës në Presidencë.

 

Bislim Zyrapi, Këshilltar i Presidentit