Zhgënjimi i radhës i serbëve nga SHBA

Ambasadorja e SHBA në Bosnjë dhe Hercegovinë (BeH), Maureen Cormack, tha se vendimi i SHBA për të vendosur sanksione ndaj Presidentit të Republikës Serbe, Milorad Dodik, nuk ka qenë vendim i thjeshtë.

Ajo shtoi se procesi i vendosjes së sanksioneve ishte shumë serioz.

“Vendimi për të vënë sanksione kundër dikujt dhe vendimet që këto sanksione të hiqen kërkon procese të gjata ligjore dhe teknike”, ka thënë Cormac në një intervistë për “Glas Srpske” të Banja Lukës, raporton agjensia Beta.

Ambasadorja amerikane ka vlerësuar se vënja e sanksioneve ndaj Dodik nuk ka çuar në krizë në BeH, duke deklaruar se sanksionet janë të përcaktuara qartë dhe se ato janë vetëm kundër Dodik.

“Shtetet e Bashkuara mbeten të përkushtuara për të ndihmuar qytetarët e Republikës Serbe për të bërë progres në sektorët ekonomik dhe shoqëror, dhe ky angazhim nuk do të ndryshojë”, ka thënë Cormac.

Ambasadorja Cormac ka shpjeguar vendimin për vendosje të sanksioneve pas referendumit antikushtetues të Republikës Serbe për shënimin e ditës së krijimit të këtij entiteti.

“Gjykata Kushtetuese vendosi se referendumi nuk duhet të mbahet ndërsa një javë më vonë ai u mbajt. Kjo është vijë e kuqe që është kaluar. Kjo nuk do të thotë se ne mendojmë se vendimet e tjera nuk mund të zbatohen,” tha ajo.

Cormac tha se ajo beson që administrata e re amerikane nuk do të ndryshojë politikën e saj ndaj BeH.

“Shtetet e Bashkuara kanë 21 vite të angazhimit të qëndrueshme në BeH dhe përparimin e saj. Në këtë marrin pjesë edhe partia Republikane dhe Demokratike, dhe unë nuk mendoj se kjo do të ndryshojë”, tha ajo.

Duket se ky qëndrim është zhgënjimi i radhës i lidërëve serbë dhe pritjet e tyre joreale në administratën e re amerikane. Vetë Dodik kishte deklaruar se ai priste një qasje tjetër ndaj tij nga administrata e re amerikane por ky qëndrim i ambasadores Cormac duhet të jete zhgënjimi i radhës pasi që atij i ishte refuzuar viza për të marrë pjesë, siç pretendonte Dodik, në inaugurimin e Presidentit të ri amerikan, Donald Trump.